منٹو کا اپنا مخصوص طرز تحریر ہے ۔ان کا یہ طرز زیر نظر ریڈیائی ڈراموں میں بخوبی نظر آتا ہے۔ ڈرامائی انداز سے لکھی گئی کہانیوں میں جنسی مکالمے کے ساتھ ادبی چاشنی بھرپور طریقے پرموجود ہے۔ پہلی کہانی "کروٹ" میں ایک میاں بیوی کے درمیان نوک جھونک اور پیار میں ناراضگی کا لطف دکھایا گیا ہے۔ دوسری کہانی "خود کشی" میں زندگی سے بیزار ایک لڑکی کی کہانی کو ڈرامائی انداز میں بیان کرتے ہوئے درمیان میں کچھ ایسے سطور ڈال دیئے گئے ہیں جن سے قاری کے ہونٹوں پر مسکراہٹ بکھر جاتی ہے ۔ مثلاً لڑکی کا چچا ایک ایسے وقت میں بھی جب وہ مرنا چاہتی ہے ،چچا کو اس بات کی فکر لگی ہوئی ہے کہ سوسائڈ نوٹ کے املا میں کسی طرح کی غلطی نہ ہو۔ کیونکہ سوسائڈ سے کچھ بگڑے یا نہ بگڑے مگر املا کی غلطیوں سے ان کی ناک کٹ جائے گی۔ کتاب کی تمام کہانیوں میں سماج میں پائی جانے والی برائیوں اورغلط رسوم و رواج پر بغیر کسی اغلاق کے روشنی ڈالی گئی ہے ۔ اسے پڑھنے کے بعد معلوم ہوتا ہے کہ ہمارے سماج میں کیسی کیسی برائیاں اور کیسے کیسے غیر اخلاقی رسوم رائج ہیں۔